ప్రజాస్వాములు

కొడుకులు బిడ్డలు కాసుకు లోనై
మూల గుడిసెలో, భోరు వర్షంలో
చలి వణుకులో, వదిలేసేరు
మూలుగుతున్న ప్రజాస్వామ్య ముసలమ్మను.
వచ్చేవాళ్ళూ, పొయ్యేవళ్ళూ
శ్మశాన సంబరం నిన్నటిదాకా.
కులాల కాకి లెక్కలు, మతాల మతలబులు
హోరెత్తించాయ్ ముసలమ్మ గుండెల్ని.
పచ్చనోట్ల గాంగ్రీనుతో నడవలెకున్న
ఆ ముదుసలి శరీరంపై నగల కోసం
కాచుకున్నారు కిరాయి రౌడీలు.
శవాల దిబ్బలో మతాబులు వెలిగించి
అదే వెలుగు అని చూపించే స్వాములు
మన ప్రజాస్వామ్య ఆసాములు.

రుణాలు

పావలా వడ్డీకే రుణాలు
పేదవాడి ఆశల తోరణాలు
జబ్బు దాచుకుంటాడు కాని
డబ్బు దాచుకోడు మన పేదోడు
పక్కనుంది గవర్నమెంటు బారు
అందులో మట్కాలు , జల్సాలు
ఇంట్లో ఆడది బేజారు

వస్తున్నాయ్ ఎన్నికల చక్రాలు సారా పొట్లాలతో
పదండి తూలుతూ, పడుతూ లేస్తూ
మీట నొక్కుదాం పోలింగు బూతు లో
గొంతు నొక్కుదాం ఎవరిదో.

గెలుపు

రంగు రంగుల జెండాలు
తెల్ల కాగితాల అజెండాలు
పేకముక్కల పై జరుగుతోంది
నవనూతన సమాజ నిర్మాణం
గెలుపు ఎవరిదైనా, ఓటమి అందరిది.

ఆశల తరంగాలు

పలుచనైన నీటి మడుగుపై
అక్కడక్కడ, అప్పుడప్పుడు
పడుతున్న వాన చినుకులు;

అవి సృష్టించే తరంగాలన్నీ
ఒక దానితో ఒకటి పోటి పడుతున్నాయ్
మనలాగా, మన ఆశల లాగ.

వర్షం

వర్షంలో తడిచి
భారంగా తటస్థించిన చెట్లు;
అదే వర్షంలో
తేలికవుతున్న నా మనస్సు
ఆ నీటి చుక్కలన్నీ నా కన్నీళ్ళేనా?
ఆ భారమంతా నా గుండె బరువేనా?

ప్రపంచతీరం

దూరంగా ఎగిసిపడుతున్న కలల అలలు
ప్రపంచతీరం చేరి విరిగి నురుగవుతాయి
ఆ మిగిలిన నీటి బుడగలలో
జీవితం వెతుక్కునే లోపు
ఇంకెన్నో కలలు
మరెన్నో అలలు, అలజడులు.

ఆరంభ శూరత్వం

తెలుగులో బ్లాగు రాయాలని ఎప్పటినుంచో అనుకుంటుంటే, ఇదిగో ఇలా ఇవ్వాళ కుదిరింది.నా మొదటి వాక్యం అదిగో అప్పుడే రాసేసాను.

ఇక ఈ తెలుగులో బ్లాగు ఎందుకంటారా, ఎప్పుడో తెలుగులో రాయడం మానేసిన నా బోటి వారికి ఇది ఒక మంచి సాధనం. మాతృభాషలో భావాలను వ్యక్తం చెయ్యడం ఒక తియ్యనైన అనుభూతి. ఇంగ్లీషులో నాకు తెలిసినంత వరకు, వివిధ భావాలకు ఒకే పదం ఉంటుంది. అదే మాతృభాషలో పదాలు ఎక్కువ మరియు అవి మనకు తెలిసినవి కూడా. ఉదాహరణకి ఇంకా సరిగ్గా పండని జామ పండు రుచి తెలుగులో అయితే వగరు, అదే ఇంగ్లీషులో అయితే 'sour' అని వాడతాం. పులుపుకి కూడా ఇంగ్లీషులో పదం 'sour' .

తెలుగు రుచులని అస్వాదించడానికి, మీకు అందించడానికి రాసుకుంటున్నదే ఈ అణు వాదం, నా మానస తరంగం. ఇందులో మీరు కథలు,కవితలు,భాషణలు,సంభాషణలు చూడొచ్చు.ఈ బ్లాగుని రెగ్యులరుగా అప్డేట్ చెయ్యడానికి ప్రయత్నిస్తాను.

మళ్లీ కలుద్దాం. ఆప్పటిదాకా సెలవు మరి !